‘സാറാസ്’ ഒ ടി ടി റിലീസിന് ഒരുങ്ങുന്നു

പ്രമുഖ ഒടിടി പ്ലാറ്റ്ഫോം ആയ ആമസോണ്‍ പ്രൈം വീഡിയോയിലൂടെ മറ്റൊരു മലയാളചിത്രം കൂടി ഡയറക്റ്റ് ഒടിടി റിലീസിന് ഒരുങ്ങുന്നു.

അന്ന ബെന്‍ ടൈറ്റില്‍ കഥാപാത്രത്തെ അവതരിപ്പിക്കുന്ന ‘സാറാസ്’ എന്ന ചിത്രം ഒ ടി ടി റിലീസിന് ഒരുങ്ങുന്നു . ജൂഡ് ആന്‍റണി ജോസഫ് ആണ് ചിത്രം സംവിധാനം ചെയ്‍തിരിക്കുന്നത് . ചിത്രത്തിൽ നായകനാവുന്നത് സണ്ണി വെയ്ന്‍ ആണ്. ചിത്രത്തിലെ ഒരു വീഡിയോ ഗാനം പുറത്തെത്തിയതിനൊപ്പമാണ് ചിത്രം ഡയറക്റ്റ് ഒടിടി റിലീസ് ആണെന്ന വിവരവും പുറത്തെത്തിയിരിക്കുന്നത്. ജൂലൈ 5 ആണ് റിലീസ് തീയതി.

സ്വതന്ത്ര സംവിധായികയാവാന്‍ ആഗ്രഹിക്കുന്ന അസോസിയേറ്റ് ഡയറക്ടര്‍ ആണ് അന്ന ബെന്‍ അവതരിപ്പിക്കുന്ന ‘സാറ’യെന്ന കഥാപാത്രം. കൊവിഡ് കാലത്ത് ചിത്രീകരണം പൂര്‍ത്തിയാക്കിയ ചിത്രമാണിത്. കൊവിഡ് കാലത്ത് ചിത്രീകരിച്ച സിനിമകളില്‍ കൂടുതലും ഇന്‍ഡോര്‍ രംഗങ്ങളാണെങ്കില്‍ നിരവധി ഔട്ട്ഡോര്‍ രംഗങ്ങളും ഒട്ടേറെ ജൂനിയര്‍ ആര്‍ട്ടിസ്റ്റുകളെ ഉല്‍പ്പെടുത്തിയുമാണ് ജൂഡ് ചിത്രീകരണം പൂര്‍ത്തിയാക്കിയത്. കൊച്ചി മെട്രോയിലും ലുലു മാളിലും വാഗമണിലുമൊക്കെ രംഗങ്ങള്‍ ചിത്രീകരിച്ചിട്ടുണ്ട്. അതേസമയം കൊവിഡ് മാനദണ്ഡങ്ങള്‍ പൂര്‍ണ്ണമായും പാലിച്ചായിരുന്നു ചിത്രീകരണമെന്ന് അണിയറക്കാര്‍ അറിയിച്ചിരുന്നു.

അന്നബെന്നിനൊപ്പം അച്ഛന്‍ ബെന്നി പി നായരമ്പലവും ചിത്രത്തില്‍ അഭിനയിക്കുന്നുണ്ട്. മല്ലിക സുകുമാരന്‍, കളക്ടര്‍ ബ്രോ പ്രശാന്ത് നായര്‍, ധന്യ വര്‍മ്മ, സിദ്ദിഖ്, വിജയകുമാര്‍, അജു വര്‍ഗീസ്, സിജു വില്‍സണ്‍, ശ്രിന്ദ, ജിബു ജേക്കബ്, പ്രദീപ് കോട്ടയം തുടങ്ങി കൗതുകമുണര്‍ത്തുന്ന താരനിര്‍ണ്ണയവുമാണ് ചിത്രത്തിന്‍റേത്. ക്ലാസ്മേറ്റ്സ് അടക്കം മലയാളത്തിന് നിരവധി ഹിറ്റുകള്‍ സമ്മാനിച്ച നിര്‍മ്മാതാക്കളായ ശാന്ത മുരളിയും പി കെ മുരളീധരനുമാണ് ചിത്രം നിര്‍മ്മിച്ചിരിക്കുന്നത്. കഥ അക്ഷയ് ഹരീഷ്, ഛായാഗ്രഹണം നിമിഷ് രവി. ലൂസിഫര്‍, മാമാങ്കം മുതലായ സിനിമകളിലൂടെ ശ്രദ്ധേയനായ മോഹന്‍ദാസ് ആണ് പ്രൊഡക്ഷന്‍ ഡിസൈന്‍.

സംഗീതം ഷാന്‍ റഹ്മാന്‍, എഡിറ്റിംഗ് റിയാസ് ബാദര്‍, വസ്ത്രാലങ്കാരം സമീറ സനീഷ്, മേക്കപ്പ് റോണക്സ് സേവ്യര്‍, സൗണ്ട്‌ വിഷ്ണു ഗോവിന്ദ്- ശ്രീ ശങ്കര്‍ (സൗണ്ട് ഫാക്ടര്‍), പ്രോജക്ട് ഡിസൈനര്‍ ബിനു മുരളി, പ്രൊഡക്ഷന്‍ കണ്‍ട്രോളര്‍ സജീവ് അര്‍ജുനന്‍, ഫിനാന്‍സ് കണ്‍ട്രോളര്‍ ബിബിന്‍ സേവ്യര്‍, ചീഫ് അസോസിയേറ്റ് ഡയറക്ടര്‍ അനീവ് സുകുമാര്‍, പിആര്‍ഒ ആതിര ദില്‍ജിത്ത്, സ്റ്റില്‍സ് സുഹൈബ്, ഡിസൈന്‍ 24എഎം. ഓം ശാന്തി ഓശാന, ഒരു മുത്തശ്ശി ഗദ എന്നീ ചിത്രങ്ങള്‍ക്കുശേഷം ജൂഡ് ആന്‍റണി ജോസഫ് വീണ്ടും സ്ത്രീകഥാപാത്രത്തിന് പ്രാധാന്യമുള്ള ചിത്രവുമായാണ് വരുന്നത് എന്നതും പ്രത്യേകതയാണ്.

Leave a Reply

Your email address will not be published. Required fields are marked *

error: Content is protected !!